Category: നാട്ടുവാർത്ത

കൊയിലാണ്ടി: ഇന്നലെ നറുക്കെടുത്ത കാരുണ്യ ലോട്ടറി ഒന്നാം സമ്മാനമായ 80 ലക്ഷം അടിച്ച ബിഹാർ സ്വദേശി കൂട്ടുകാരോടൊപ്പം കൊയിലാണ്ടി പോലീസ് സ്റ്റേഷനിൽ അഭയം പ്രാപിച്ചു. ശനിയാഴ്ച നറുക്കെടുത്ത KB 586838 നമ്പർ ടിക്കറ്റുമായാണ് ബീഹാർ സ്വദേശി മുഹമ്മദ് സായിദ്(41) കൂട്ടുകാരായ ആസാദുൽ, മാനിറുൽ എന്നിവരുമായി ഇന്നു പുലർച്ചെ കൊയിലാണ്ടി സ്റ്റേഷനിൽ അഭയം പ്രാപിച്ചത്. കൊയിലാണ്ടി കൊല്ലത്തു നിന്നുമാണ് ഇയാൾ ടിക്കറ്റെടുത്തത്. 22 ഓളം ടിക്കറ്റുകൾ എടുത്തതായാണ് പറയുന്നത്. ഇതിൽ ഒന്നിലാണ് സമ്മാനമടിച്ചത്. നന്തി ലൈറ്റ് ഹൗസിനു സമീപമാണ് താമസിക്കുന്നത് 12 വർഷമായി ഇവിടെ എത്തി കോൺക്രീറ്റ് പ്രവൃത്തിയിൽ ഏർപ്പട്ടിട്ട്. പാലക്കാട് ഷൺമുഖ ഏജൻസിസിൻ്റെതാണ് സമ്മാനമടിച്ച ടിക്കറ്റ്. വിവരമറിഞ്ഞാൽ മറ്റുള്ളവർ തന്നെ അപായപ്പെടുത്തുമെന്ന ഭയമാണ് മുഹമ്മദ് സായിദിനെ കൊയിലാണ്ടി പോലീസ് സ്റ്റേഷനിൽ അഭയം പ്രാപിക്കാൻ പ്രേരിപ്പിച്ചത് മാത്രമല്ല ഞായറാഴ്ച ബാങ്ക് അവധിയും കാരണമാണെന്ന് മുഹമ്മദ് സായിദ് പറഞ്ഞു. ടിക്കറ്റ് പോലീസ് സ്റ്റേഷനിൽ സൂക്ഷിച്ചിട്ടുണ്ട്. ബാങ്ക് മാനേജർമാരായി ബന്ധപ്പെട്ടെന്നും ഇന്ന് അവധിയായതിനാൽ നാളെ ആവശ്യമായ നടപടികൾ സ്വീകരിക്കാമെന്നാണ് ബാങ്ക് മാനജർമാർ പറയുന്നതെന്ന് എസ്.ഐ. കെ.കെ.രാജേഷ് പറഞ്ഞു. ആവശ്യമായ സംരക്ഷണം നൽകുമെന്നും പോലീസ് പറഞ്ഞു. എസ്.ഐ. ബാബുരാജ്, ജി ഡി. ചാർജ് ഷൈബു നാഥൻ, എൻ.എം.സുനിൽ, കെ.ബിന്ദു, ഡ്രൈവർ ബൈജു. തുടങ്ങിയവർ ഇവരുമായി സംസാരിച്ചു. 

കൊയിലാണ്ടി: പഴയ ബസ്സ് സ്റ്റാന്റിൽ സ്വകാര്യ പരസ്യ കമ്പനിയുടെ അനധികൃത നിർമ്മാണം മുന്‍സിപ്പാലിറ്റി പൊളിച്ചുമാറ്റി. കഴിഞ്ഞ ഒന്നര വർഷം മുമ്പ് പൊളിച്ച് മാറ്റാൻ നഗരസഭ ഉത്തരവിട്ട പഴയ സ്റ്റാന്റിലെ കോടതിയുടെ ഭാഗത്തെ ബസ്സ്‌സ്‌റ്റോപ്പിലാണ് വീണ്ടും വലിയ പരസ്യബോർഡ് വെക്കാൻ പാകത്തിൽ കൺസ്ട്രക്ഷൻ ആരംഭിച്ചത്. വടകര ആസ്ഥാനമായി പ്രവർത്തിക്കുന്ന വി.എൻ.ആർ. ഔട്ട് ഡോർമീഡിയ എന്ന പരസ്യ കമ്പനിയാണ് അനധികൃത നിർമ്മാണത്തിന് നേതൃത്വം നൽകിയത്. എഗ്രിമെന്റ് പ്രകാരം ഒന്നര വർഷം മുമ്പ് പൊളിച്ച് മാറ്റാൻ ഉത്തരവിട്ട ബസ്സ് സ്‌സ്റ്റോപ്പിലാണ് വീണ്ടും നിർമ്മാണം നടത്തിയത്. അതിനിടെ നഗരസഭയുടെ അനുമതി ഇല്ലാതെ ഇവർ മറ്റ് പരസ്യങ്ങൾ നൽകി വൻ ലാഭം ഉണ്ടാക്കുകയും ചെയ്തു. 

കൊയിലാണ്ടി: കാപ്പാട് ടൂറിസ്റ്റ് കേന്ദ്രത്തിൽ  നടപ്പാക്കിയിട്ടുള്ള പ്രവേശന ഫീസ് പൂർണമായി ഒഴിവാക്കണമെന്ന് ആവശ്യപ്പെട്ടുകൊണ്ട് സി പി ഐ എം കാപ്പാട് ലോക്കൽ കമ്മിറ്റിയുടെ നേത്യത്വത്തിൽ കാപ്പാട് ടൂറിസ്റ്റ് കേന്ദ്രത്തിലേക്ക് പ്രതിഷേധ മാർച്ച് സംഘടിപ്പിച്ചു.

നേരത്തെ സുനാമി പുനരധിവാസ പദ്ധതിയിൽ ഉൾപ്പെടുത്തി നിർമിച്ച ടൂറിസ്റ്റ് കേന്ദ്രത്തിൽ ഇപ്പോൾ ബ്ലൂ ഫാഗ് സർട്ടിഫിക്കേഷൻ്റെ ഭാഗമായി കേന്ദ്ര പരിസ്ഥിതി മന്ത്രാലയത്തിൻ്റെ ഫണ്ടിൽ 8 കോടി രൂപയുടെ അടങ്കലുള്ള പ്രവൃത്തികളാണ് നടന്നത്. ഇതിൽ 5 കോടി രൂപ നിർമ്മാണ പ്രവർത്തനങ്ങൾക്കും ബാക്കി വരുന്ന 3 കോടി രൂപ നിർമാണം കഴിഞ്ഞുള്ള മൂന്നു വർഷക്കാലത്തെ തൊഴിലാളികളുടെയും ജീവനക്കാരുടെയും ശമ്പളം ഉൾപ്പെടെയുള്ള ആവർത്തനച്ചെലവുകൾക്കുമാണ്. നിർമാണം പൂർത്തിയായാലുടനെ തദ്ദേശ സ്വയംഭരണ സ്ഥാപനത്തിന് കൈമാറണമെന്ന വ്യവസ്ഥയുമുണ്ട്. എന്നാൽ ഈ എല്ലാ വ്യവസ്ഥകളുടെയും നഗ്നമായ ലംഘനത്തിലൂടെയാണ് ഡി ടി പി സി ടൂറിസ്റ്റ് കേന്ദ്രത്തിൽ പ്രവേശിക്കുന്നതിന് 50 രൂപ പ്രവേശന ഫീസ് ഏകപക്ഷീയമായി ഏർപ്പെടുത്തിയത്. 3 വർഷക്കാലത്തേക്കുള്ള നടത്തിപ്പ് ചെലവുകൾക്ക് പദ്ധതിയിൽ തന്നെ വ്യവസ്ഥ ഉണ്ടായിരിക്കെയാണ് ഈ പകൽക്കൊള്ള നടത്തുന്നത്. പ്രകൃതി വാരിക്കോരി നൽകിയ കടലിൻ്റെ വന്യമായ സൗന്ദര്യവും പഞ്ചാരമണലിനോട് കിന്നാരം പറഞ്ഞിറങ്ങുന്ന തിരമാലകൾ നൽകുന്ന അനന്യമായ അനുഭൂതിയുമല്ലാതെ 50 രൂപ പ്രവേശന ഫീസ് നൽകി കാണേണ്ടതായ യാതൊന്നും കാപ്പാട് ബീച്ചിലില്ല. ഇതിലേറെ സവിശേഷതകളും ഭാരിച്ച സാമ്പത്തിക ചെലവിൽ നിർമ്മിച്ചതുമായ കോഴിക്കോട് നഗരം ഉൾപ്പെടെയുള്ള കടലോരങ്ങളിൽ പ്രവേശനം പൂർണമായി സൗജന്യമായിരിക്കെയാണ് കാപ്പാട് ബീച്ചിൽ ഈ വിവേചനം സഞ്ചാരികളോട് കാണിക്കുന്നത്. 50 രൂപപ്രവേശന ഫീസ് ഏർപ്പെടുത്തി കാപ്പാട് ബീച്ചിലേക്കുള്ള സഞ്ചാരികളുടെ പ്രവാഹത്തെ തടയുന്നതിനുള്ള ഗൂഢപദ്ധതിയാണ് ഇതിലൂടെ നടപ്പാക്കുന്നതെന്ന് ന്യായമായും സംശയിച്ചു പോകുന്ന സാഹചര്യമാണ്.

കാപ്പാട് ടൗണിൽ നിന്ന് ആരംഭിച്ച പ്രതിഷേധ മാർച്ചിന് പാർടി നേതാക്കളായ പി കെ ഭാസ്കരൻ , പി കെ പ്രസാദ്, എം കൃഷ്ണൻ, ബിജീഷ് എൻ, പി കെ സത്യൻ എന്നിവർ നേതൃത്വം നൽകി. ടൂറിസ്റ്റ് കേന്ദ്രത്തിൻ്റെ കവാടത്തിൽ മാർച്ച് പോലീസ് തടഞ്ഞെങ്കിലും മുഴുവൻ സമരസഖാക്കളും പോലിസിനെ തട്ടിമാറ്റി പാർക്കിൽ പ്രവേശിച്ചു. തുടർന്ന് പാർടി കൊയിലാണ്ടി ഏരിയാ സെക്രട്ടറി കെ കെ മുഹമ്മദ് മാർച്ച് ഉദ്ഘാടനം ചെയ്തു. ചേമഞ്ചേരി ഗ്രാമപഞ്ചായത്ത് മുൻ പ്രസിഡണ്ടും പാർടി കാപ്പാട് ലോക്കൽ കമ്മിറ്റി അംഗവുമായ സ.അശോകൻകോട്ട് അദ്ധ്യക്ഷത വഹിച്ചു. ഏരിയാ കമ്മിറ്റി മെമ്പർ കെ രവീന്ദ്രൻ സമരത്തെ അഭിവാദ്യം ചെയ്തു. ലോക്കൽ സെക്രട്ടറി എം നൗഫൽ സ്വാഗതം പറഞ്ഞു.എം. സുരേഷ് നന്ദി പറഞ്ഞു. പ്രവേശന ഫീസ് പിൻവലിക്കുന്നതു വരെ ശക്തമായ സമരപരിപാടികളുമായി മുന്നോട്ട് പോകാനാണ് സി പി ഐ എം  തീരുമാനിച്ചിട്ടുള്ളത്

കൊയിലാണ്ടി: കോഴിക്കോട് ദേശീയപാത 66-ൽ കൊയിലാണ്ടി റെയിൽവെ മേൽപ്പാലം റോഡ് ജംഗ്ഷനിൽ (പഴയ ബസ്സ് സ്റ്റാന്റിന് മുൻവശം) ഇൻറർ ലോക്ക് ടൈൽ പതിക്കുന്നതിനാൽ ജനുവരി 9-ാം തിയ്യതി മുതൽ ജോലി തീരുന്നത് വരെ വടകര ഭാഗത്ത് നിന്നും കോഴിക്കോട് ഭാഗത്തേക്ക് പോകേണ്ട ചെറിയ വാഹനങ്ങൾ ആനക്കുളത്ത് നിന്നും ഇടത്തോട്ട് തിരിഞ്ഞ് മുചുകുന്ന് റോഡിലൂടെ പുളിയഞ്ചേരി, നെല്യാടി റോഡിൽ പ്രവേശിച്ച് – വിയ്യൂർ – ഇല്ലത്ത് താഴെ വഴി പെരുവട്ടൂർ – മുത്താമ്പി റോഡ്, റെയിൽവെ മേൽപ്പാലം, കുറുവങ്ങാട് വഴി ചെങ്ങോട്ട്കാവ് ദേശീയപാതയിൽ പ്രവേശിക്കേണ്ടതുമാണ്.

കോഴിക്കോട് ഭാഗത്ത് നിന്നും വടകര ഭാഗത്തേക്ക് പോകേണ്ട ചെറിയ വാഹനങ്ങൾ അരങ്ങാടത്ത് 14-ാം മൈൽസിൽ ഇടത്തോട്ട് തിരിഞ്ഞ്, ഹാർബർ ബീച്ച് റോഡ്, പഴയ പോലീസ് സ്റ്റേഷൻ റോഡ് (ട്രാഫിക് പോലീസ് സ്റ്റേഷൻ) വഴി ദേശീയപാതയിൽ പ്രവേശിച്ച് വടകര ഭാഗത്തേക്ക് പോകേണ്ടതുമാണ്. കൂടാതെ കണ്ണൂർ, നാദാപുരം ഭാഗത്ത് നിന്നും കോഴിക്കോട് ഭാഗത്തേക്ക് പോകേണ്ട ചെറിയ വാഹനങ്ങൾ കുറ്റ്യാടി, പേരാമ്പ്ര, ഉള്ള്യേരി, അത്തോളി വഴി പോകേണ്ടതുമാണ്. ഇന്നലെ കൊയിലാണ്ടി നഗരസഭ ചെയർപേഴ്സൺ അധ്യക്ഷയായ ട്രാഫിക് അഡ്വൈസറി കമ്മിറ്റി യോഗത്തിലാണ് തീരുമാനമെടുത്തത്.

കൊയിലാണ്ടി: നാളെ 07-01-2021നു് രാവിലെ 6.30 മുതൽ വൈകീട്ട് 3 മണി വരെ, കൊയിലാണ്ടി ടൗൺ, കോടതി പരിസരം, സബ് ജയിൽ, ബീച്ച് റോഡ്, താലൂക്ക് ഹോസ്പിറ്റൽ, ബി.എസ്.എൻ.എൽ എന്നിവിടങ്ങളിൾ HT Maintenance/Touching Clearing നടക്കുന്നതിനാൽ വൈദ്യുതി മുടങ്ങും. മാന്യ ഉപഭോക്താക്കൾ സഹകരിക്കുക.

കൊയിലാണ്ടി: ദിവസങ്ങളായി കണ്ടു വരുന്ന അതി രൂക്ഷമായ ഗതാഗത കുരുക്കിന് പരിഹാരം കാണുവാൻ വടകര ആർ.ഡി.ഒ വി.പി അബ്‌ദുറഹ്മാൻ കൊയിലാണ്ടിയിൽ സന്ദർശനം നടത്തി. ബുധനാഴ്ച രാത്രിയിൽ ആണ് അദ്ദേഹം കൊയിലാണ്ടി സന്ദർശിച്ചത്. കൊയിലാണ്ടി തഹസിൽദാർ സി.പി.മണി, ട്രാഫിക് എസ്.ഐ. സന്തോഷ് തുങ്ങിയവർ ആർ.ഡി.ഒ വിനൊടൊപ്പം ഉണ്ടായിരുന്നു.

സൗന്ദര്യവൽക്കരണ പ്രവർത്തിയുടെ ഭാഗമായി പഴയ സ്റ്റാൻ്റിനു മുൻവശം ദേശീയ പാതയിൽ ടൈൽ സ്ഥാപിക്കുന്ന പ്രവർത്തി ആരംഭിച്ചതോടെയാണ് ഗതാഗത കുരുക്ക് രൂക്ഷമായത്. കഴിഞ്ഞ ദിവസം ദേശീയ പാതയിൽ രാവിലെ മുതൽ ആരംഭിച്ച ഗതാഗത കുരുക്ക് രാത്രി വൈകിയും അവസാനിച്ചിരുന്നില്ല. കഴിഞ്ഞ ആറ് മാസമായി കൊയിലാണ്ടിയിൽ സൗന്ദര്യ പ്രവർത്തികൾ നടന്നുവരുന്നു. ടൈൽ പാകുന്ന ജോലി പടിഞ്ഞാറ് ഭാഗം മുഴുവൻ തീർത്ത ശേഷം ഒരാഴ്ച വൈബ്രേഷൻ ടെസ്റ്റ് നടത്തിയ ശേഷം മറു ഭാഗം കോൺക്രീറ്റ് ചെയ്യുമെന്നാണ് കരാറുകാരൻ പറയുന്നത്. ഈ പ്രവർത്തി തീരണമെങ്കിൽ 20 ദിവമെങ്കിലും വേണ്ടിവരും. വർക്ക് നടക്കുന്നതിനെ തുടർന്നുണ്ടാവുന്ന രൂക്ഷമായ പൊടിശല്യത്തിന് പരിഹാരം കാണുമെന്ന് അദ്ദേഹം പറഞ്ഞു.

കൊയിലാണ്ടി: കോവിഡ് മൂലം മാസങ്ങളായി അടഞ്ഞുകിടക്കുന്ന സ്കൂളുകളിലെ 10, 12 ക്ലാസുകളും, വി.എച്ച്.എസ്.ഇ രണ്ടാം വർഷ ക്ലാസുകളും, സംശയ ദുരീകരണത്തിനും പ്രാക്ടിക്കലിനും പരിശീലനങ്ങൾക്കും വേണ്ടി, മാനദണ്ഡങ്ങൾക്ക് വിധേയമായി ജനുവരി ഒന്നു മുതൽ ആരംഭിക്കാൻ നടപടികൾ തുടങ്ങി.  കോവിഡ് സുരക്ഷാ മാനദണ്ഡങ്ങൾ പാലിച്ചുകൊണ്ടാണ് സ്കൂളുകൾ തുറക്കുന്നത്. തുറക്കുന്നതിന് മുന്നോടിയായി വിവിധ വകുപ്പുകളുടെ സഹായത്തോടെ ഏകോപിച്ചു നടത്തേണ്ടുന്ന  ക്രമീകരണങ്ങൾ സംബന്ധിച്ച് കെ.ദാസൻ എം.എൽ.എ വിളിച്ചു ചേർത്ത യോഗം കൊയിലാണ്ടി നഗരസഭാ ടൗൺ ഹാളിൽ വെച്ച് നടന്നു. സ്കൂളിലേക്ക് കടന്നു വരുമ്പോൾ പാലിക്കേണ്ട  മാനദണ്ഡങ്ങളെക്കുറിച്ച്, വിദ്യാർത്ഥികളിലേക്ക് കാര്യങ്ങൾ എത്തിക്കാൻ രണ്ട് ദിവസങ്ങൾക്കുള്ളിൽ എല്ലാ സ്കൂളുകളിലും പി.ടി.എ, ക്ലാസ് റൂം പി.ടി.എ എന്നിവ വിളിച്ചു ചേർക്കാൻ ധാരണയായി. ശുചീകരണ, അണു നശീകരണ പ്രവൃത്തികൾക്ക് ഫയർഫോഴ്സ്, പോലീസ്, ആരോഗ്യം വിഭാഗങ്ങളുടെ സഹായം ലഭ്യമാക്കും. എല്ലാ പ്രവർത്തനങ്ങളും പരസ്പ സഹകരണത്തോടെ നിർവ്വഹിക്കാനും ധാരണയായി. ക്ലാസ് ആരംഭിക്കുന്നതോടെ പ്രായോഗിക ഘട്ടത്തിൽ ഉയർന്നു വരുന്ന മറ്റ് വിഷയങ്ങളിൽ അപ്പപ്പോൾ  വിദ്യാഭ്യാസ വകുപ്പ് നൽകുന്ന നിർദ്ദേശങ്ങൾ പാലിച്ച് കൊണ്ട് മുന്നോട്ടു പോകാനും തീരുമാനിച്ചു.

യോഗത്തിൽ എം.എൽ.എ യെ കൂടാതെ വടകര ഡി.ഇ.ഒ പി.കെ.വാസു മാസ്റ്റർ, കൊയിലാണ്ടി എ.ഇ.ഒ സുധ.വി.പി ,  ബ്ലോക്ക് പ്രൊജക്ട് കോ ഓർഡിനേറ്റർ രാജീവൻ വളപ്പിൽകുനി എന്നിവരും നിരവധി പ്രധാനധ്യാപകരും വിവിധ വകുപ്പുകളെ പ്രതിനിധീകരിച്ച് നിരവധി ഉദ്യോഗസ്ഥരും പങ്കെടുത്തു.

കൊയിലാണ്ടി നഗരസഭയിലെ ഇടതുപക്ഷ കൗൺസിലർമാർക്കു സ്വീകരണവും റാലിയും നടത്തി. കൊയിലാണ്ടി പുതിയ ബസ്സ് സ്റ്റാൻഡ് പരിസരത്തു വെച്ച് നടന്ന റാലി സി എൻ ചന്ദ്രൻ (സി പി ഐ സംസ്ഥാന എക്സിക്യൂട്ടീവ് അംഗം) ഉദ്ഘാടനം ചെയ്തു.

കൊയിലാണ്ടി: കായലാട്ട് രവീന്ദ്രൻ (കെപിസിസി) ഏട്ടാമാത് അനുസ്മരണം, നാളികേരം കോർപറേഷൻ ചെയർമാൻ നാരായണൻ ഉദ്ഘാടനം ചെയ്തു. ഇ കെ അജിത് അധ്യക്ഷത വഹിച്ചു. വി കെ രവി അനുസ്മരണ പ്രഭാഷണം നടത്തി. രാഗം മുഹമ്മദലി, സുനിൽ മോഹൻ, ചിന്നൻ നായർ, പി കെ വിശ്വൻ, എൻ കെ വിജയഭാരതി, ബാബു പഞ്ചാട്ട് എന്നിവർ സംസാരിച്ചു. കെ കെ സുധാകരൻ നന്ദി പറഞ്ഞു

കൊയിലാണ്ടി: നഗരസഭയിലേക്ക് തെരഞ്ഞെടുക്കപ്പെട്ട ജനപ്രതിനിധികൾ തിങ്കളാഴ്ച രാവിലെ 10 മണിക്ക് സത്യ പ്രതിജ്ഞ ചെയ്യും. കൊയിലാണ്ടി നഗരസഭ ഇ.എം.എസ്. ടൌൺഹാളിൽ വരണാധികാരിയും ജില്ലാ പട്ടികജാതി ഡെവലപ്പ്മെൻ്റ് ഓഫീസറുമായ (കൊയിലാണ്ടി നഗരസഭ) കെ. പി. ഷാജി സത്യവാചകം ചൊല്ലിക്കൊടുക്കും നഗരസഭയിലേക്ക് തെരഞ്ഞെടുക്കപ്പെട്ട മുതിർന്ന അംഗം രത്നവല്ലി ടീച്ചർക്കാണ് ആദ്യം സത്യവാചകം ചൊല്ലിക്കൊടുക്കുക. തുടർന്ന് രത്നവല്ലി ടീച്ചർ 1 മുതൽ യഥാക്രമം 44 വാർഡിലെ ജനപ്രതിനിധികൾക്കും സത്യവാചകം ചൊല്ലിക്കൊടുക്കും. ഹാളിന് പുറത്തുള്ള പൊതുജനങ്ങൾക്ക് പ്രത്യേകം സജ്ജമാക്കിയ ബിഗ് സ്ക്രീനിൽ കാണാൻ സൌകര്യം ഒരുക്കിയിട്ടുണ്ട്.

കൊയിലാണ്ടി മർച്ചന്റ്സ് അസോസിയേഷൻ വാർഷിക കലണ്ടർ. ബഹു അമേത്ത്‌ കുഞ്ഞഹമ്മദിനു നൽകി പ്രസിഡന്റ് K. K. നിയാസ് പ്രകാശം ചെയ്തു. K.P. രാജേഷ്, K. ദിനേശൻ, P ചന്ദ്രൻ എന്നിവർ സംബന്ധിച്ചു.

കൊയിലാണ്ടി: കൊയിലാണ്ടി നഗരസഭാ ഭരണം നിലനിർത്തിയതോടെ ചെയർപേഴ്സണായി സുധ കിഴക്കെപ്പാട്ടിന് സാധ്യത. നഗരസഭയിലെ 14-ാം വാർഡായ പന്തലായനി സെൻട്രൽ വാർഡിൽ നിന്നും 226 വോട്ടിൻ്റെ ഭൂരിപക്ഷത്തിലാണ് വിജയം കൈവരിച്ചത്. 2010 ൽ പന്തലായനി വാർഡിൽ നിന്നും 3 വോട്ടിൻ്റെ ഭൂരിപക്ഷത്തിൽ യു.ഡി.എഫിൻ്റെ സീറ്റ് പിടിച്ചെടുത്തായിരുന്നു തുടക്കം. കൗൺസിലറായി മികച്ച പ്രവർത്തനം നടത്തിയതിനെ തുടർന്ന് 2015ൽ എൽ ഡി.എഫ് 100 ലെറെ വോട്ടുകൾക്ക് വിജയിച്ചത്. പന്തലായനി ബ്രാഞ്ച് സെക്രട്ടറി, ലോക്കൽ കമ്മിറ്റി മെംബംർ, ജനാധിപത്യ മഹിളാ അസോസിയേഷൻ മേഖലാ സെക്രട്ടറിയുമാണ് സുധ കിഴക്കെപ്പാട്ട്.

കോഴിക്കോട്: സംസ്ഥാനത്തെ തദ്ദേശ തിരഞ്ഞെടുപ്പിന്റെ അവസാനഘട്ട വോട്ടെടുപ്പ് ആരംഭിച്ചു. മലപ്പുറം, കോഴിക്കോട്, കണ്ണൂര്‍, കാസര്കോഭട് ജില്ലകളില്‍ ഇന്ന് വിധിയെഴുതും.
കോവിഡ് മാനദണ്ഡങ്ങള്‍ പോലും ലംഘിച്ചുള്ള കൊട്ടിക്കക്കലാശത്തിനു പിന്നാലെയാണ്
ജില്ലകളില്‍ ഇന്ന്‌ പോളിങ് ആരംഭിക്കുന്ന്ത് .
നാല് ജില്ലകളിലായി 10,834 ബൂത്തുകളിലാണ് വോട്ടെടുപ്പ് നടക്കുന്ന്ത്. 10,842 പോളിങ്ങ് ബൂത്തുകളില്‍ 1105 പ്രശ്‌നബാധിത ബൂത്തുകളായതിനാല്‍ വെബ്കാസ്റ്റിങ് ഏര്പ്പെ്ടുത്തിയിട്ടുണ്ട്. 354 തദ്ദേശസ്ഥാപനങ്ങളിലെ 6867 വാര്ഡുെകളിലായി 22,151 സ്ഥാനാര്‍ത്ഥികളാണ് മത്സരത്തിനിറങ്ങുന്നത്. 89,74,993 ആകെ വോട്ടര്മാ്രാണുളളത്.

രാവിലെ 7 മുതല്‍ വൈകിട്ട് 6 വരെയാണ് വോട്ടെടുപ്പ്. ഇന്നലെ വൈകിട്ട് 3 മുതല്‍ വോട്ടെടുപ്പ് അവസാനിക്കുംവരെ സര്ട്ടിവഫൈഡ് ലിസ്റ്റില്‍ ഉള്പ്പെുടുന്ന കോവിഡ് ബാധിതര്ക്കും ക്വാറന്റീനിലുളളവര്ക്കുംസ ആരോഗ്യവകുപ്പിലെ ചുമതലപ്പെട്ട ഹെല്ത്ത് ഓഫീസര്‍ നല്കു്ന്ന സാക്ഷ്യപത്രം ഹാജരാക്കി പിപിഇ കിറ്റ് ധരിച്ച് 6 നകം നേരിട്ടെത്തി വോട്ടുചെയ്യാം. ക്യൂവിലുളള മറ്റെല്ലാവരും വോട്ടു ചെയ്തി പോയിട്ടാണ് ഇവര്ക്കു ളള പ്രവേശനം. പോളിങ് സ്റ്റേഷനുകളിലെ വോട്ടിങ് യന്ത്രങ്ങളുടെയും സാമഗ്രികളുടെയും വിതരണം ഇന്നലെ പൂര്ത്തി യായി.16 നാണ് വോട്ടെല്‍ നടക്കുന്നത്.

ആദ്യ രണ്ടു ഘട്ടങ്ങളില്‍ പോളിങ് ശരാശരി 74.84 ശതമാനമായിരുന്നു. സമാനമായ പോളിംഗാണ് അവസാനഘട്ടത്തിലും പ്രതീക്ഷിക്കുന്നത്.

കൊയിലാണ്ടി : നഗരസഭയിലെ പുതിയ വോട്ടർമാർക്കുള്ള തിരഞ്ഞെടുപ്പ് കമ്മീഷന്റെ തിരിച്ചറിയൽ കാർഡ് താഴെ കൊടുത്ത പ്രകാരം നഗര സഭ ഓഫീസിൽ നിന്നും ഓഫീസ് പ്രവർത്തി സമയത്തു വിതരണം ചെയ്യുന്നതാണ്. തിരിച്ചറിയൽ കാർഡ് കൈപ്പറ്റുവാൻ സമ്മതി ദായകർ നേരിട്ട് ഹാജരാകേണ്ടതാണ് എന്ന് കൊയിലാണ്ടി നഗരസഭാ സെക്രട്ടറി അറിയിച്ചിരിക്കുന്നു.