Month: February 2022

കൊയിലാണ്ടി: തിരുവങ്ങൂരിൽ അടച്ചിട്ട വീട്ടിൽ മോഷണം.16 പവനും 20000 രൂപയും കളവു പോയി. തിരുവങ്ങൂർ പരത്തോട്ടത്തിൽ ഷർഷാദിൻ്റെ വീട്ടിലാണ് മോഷണം നടന്നത്. ശനിയാഴ്ച രാവിലെ കുടുംബ സമേതം കാസർഗോഡ് ബന്ധു വീട്ടിൽ പോയി ഞായറാഴ്ച രാത്രിയാണ് തിരിച്ചെത്തിയത്. ഇന്ന് രാവിലെ നോക്കുമ്പോഴാണ് വീടിൻ്റെ പിൻഭാഗത്തെ ഗ്രിൽ പൊളിച്ചു അകത്തു കടന്നു ബെഡ്‌റൂമിലെ അലമാരയിൽ സൂക്ഷിച്ചിരുന്ന 20000 രൂപയും 16 പവനും പോയതായി അറിഞ്ഞത്. ഏതാണ്ട് 6,80,000 രൂപയുടെ നഷ്ടം കണക്കാക്കുന്നു.ഡോഗ് സ്വകാഡ്  സമീപത്തെ കട വരെ പോയിട്ട് തിരിച്ചു വന്നു. വിരലടയാള വിദഗ്ദരും  സ്ഥലത്തെത്തി പരിശോധന നടത്തി. കൊയിലാണ്ടി സി.ഐ.എൻ. സുനിൽ കുമാറിൻ്റെ നേതൃത്വത്തിൽ, എസ്.ഐ. എം.എൽ. അനൂപ്, സീനിയർ സിവിൽ പോലീസ് ഓഫീസർ ബിനീഷ്, രാജീവ്‌, ദിലീപ് എന്നിവരുടെ നേതൃത്വത്തിൽ ഉള്ള  സംഘമാണ് കേസന്വേഷിക്കുന്നത്.

കൊയിലാണ്ടി: എല്ലാവരും കൃഷിയിലേക്ക് എന്ന സന്ദേശമുയർത്തിപ്പിടിച്ച് കോഴിക്കോട് ജില്ലാ നടീൽ ഉത്സവം കൊയിലാണ്ടി ഏരിയയിൽ കീഴരിയൂരിൽ നടന്നു. സിപിഐ എം നേതൃത്വത്തിൽ നടക്കുന്ന സംയോജിത കൃഷിയുടെ ക്യാമ്പയിന്റെ ഭാഗമായാണ് പരിപാടി. വിഷുവിന് വിഷരഹിത പച്ചക്കറി എന്നത് പദ്ധതിയുടെ ഭാഗമായി ലക്ഷ്യമിടുന്നു. കർഷകർ ,കർഷക തൊഴിലാളികൾ,തൊഴിലാളികൾ,യുവാക്കൾ,മഹിളകൾ, വിദ്യാർത്ഥികളടക്കം എല്ലാവരെയും ചേർത്തു പിടിച്ചാണ് കൂട്ടായ്മ വിപുലപ്പെടുത്തുന്നത്.നടീൽ ഉത്സവം സ: ടി.പി.രാമകൃഷ്ണൻ എം.എൽ.എ ഉദ്ഘാടനം ചെയ്തു. വിഷുവിന് 150 വിപണന കേന്ദ്രങ്ങൾ ഒരുക്കും. ഫിബ്രവരി 5 ന് മുമ്പ് പ്രാദേശിക നടീൽ ഉത്സവങ്ങർ സംഘടിപ്പിക്കു. കൺവീനർ കെ.കെ.ദിനേശൻ അദ്ധ്യക്ഷത വഹിച്ച ചടങ്ങിൽ ഏരിയാ തല കൺവീനർ കെ.ഷിജു സ്വാഗതം പറഞ്ഞു.പി. വിശ്വൻ മാസ്റ്റർ, കെ.കെ. മുഹമ്മദ്ദ് ,ടി.കെ.ചന്ദ്രൻ മാസ്റ്റർ, മേലടി ബ്ലോക്ക് പഞ്ചായത്ത് പ്രസിഡൻ്റ് K. ഗോപാലൻ നായർ, പന്തലായനി ബ്ലോക്ക് പഞ്ചായത്ത് പ്രസിഡൻ്റ് പി.ബാബുരാജ്, കീഴരിയൂർ ഗ്രാമപഞ്ചായത്ത് പ്രസിഡൻ്റ് കെ.കെ.നിർമ്മല, എ.സി.ബാലകൃഷ്‌ണൻ, എൻ.എം.സുനിൽ എന്നിവർ സംസാരിച്ചു. പി.കെ.ബാബു നന്ദിയും പറഞ്ഞു.

കൊയിലാണ്ടി: പ്രശസ്ത നാടക പ്രവർത്തകനും സംഘാടകനുമായിരുന്ന ദാമു കാഞ്ഞിലശ്ശേരിയുടെ സ്മരണാർത്ഥം പൂക്കാട് കലാലയം ഏർപ്പെടുത്തിയ നാടക പുരസ്കാരത്തിന് ഇത്തവണ വേണുകുനിയിലിനെ തെരഞ്ഞെടുത്തു. നാടക പിന്നണി പ്രവർത്തകൻ, സംഘാടകൻ, നടൻ എന്നീ നിലകളിൽ നാടക രംഗത്തെ നാലുപതിറ്റാണ്ടിലേറെക്കാലത്തെ  സംഭാവനകൾ പരിഗണിച്ചാണ് പുരസ്ക്കാരം. പൂക്കാട് കലാലയത്തിൻ്റെയും മറ്റ് ഗ്രാമീണ നാടക സമിതികളുടെയും നിരവധി നാടകങ്ങൾക്കും സാങ്കേതികത്തികവോടെ  പശ്ചാത്തലമൊരുക്കുന്നതിലും പ്രവർത്തനങ്ങളിലും വേണുവിൻ്റെ സജീവ സാന്നിദ്ധ്യമുണ്ടായിരുന്നു. 2022 ഫിബ്രവരി 5 ന് വൈകീട്ട് 4 മണിക്ക് കോവിഡ് മാനദണ്ഡങ്ങളോടെ നടത്തുന്ന അനുസ്മരണ സമ്മേളനത്തിൽ പ്രശസ്ത നാടക സംവിധായകൻ മനോജ് നാരായണൻ പുരസ്ക്കാരം സമർപ്പിക്കും.

കൊയിലാണ്ടി: റെയിൽവെ അണ്ടർ പാത്തിലേക്ക് ലോറി ഇടിച്ചു കയറി വൻ അപകടം ഒഴിവായി. ഇന്നു രാവിലെ ആറ് മണിയോടെയാണ് സംഭവം. ബാലുശ്ശേരി ഭാഗത്തു നിന്നും സിമൻ്റുമായെത്തിയ  ലോറിയാണ് അണ്ടർ പാത്തിലേക്ക് ഇടിച്ചു കയറിയത്. ദിശമാറി പോകുന്നത് കണ്ട് നാട്ടുകാർ ഒച്ച വെച്ചപ്പോഴാണ് ലോറി നിർത്തിയത് അപ്പോഴേക്കും അണ്ടർ പാത്തിലെ ബാരിക്കേഡിൽ ഇടിച്ചിരുന്നു. നിരവധി വാഹനങ്ങളും ആളുകളും കടന്നുപോകുന്ന അണ്ടർ പാത്തിൽ ആ സമയത്ത് ആരും ഇല്ലാതിരുന്നത് വൻ ദുരന്തമാണ് ഒഴിവായത്. കൊയിലാണ്ടി എസ്.ഐ. എസ്.എസ്. ശ്രീജേഷും സംഘവും കുതിച്ചെത്തി പി. സനൽ, പുഷ്പൻ തുടങ്ങിയവരും നേതൃത്വത്തിൽ പോലീസും, കൊയിലാണ്ടി അഗ്നി രക്ഷാ സേനയും സ്ഥലത്തെത്തി നാട്ടുകാരുടെ സഹായത്തോടെ ലോറിക്കുള്ളിൽ കുടുങ്ങിയ ഡ്രൈവറെ ഡോർ വെട്ടിപൊളിച്ചാണ് പുറത്തെടുത്തത്. ഡ്രൈവർക്ക് നിസ്സാര പരിക്കേറ്റു.